Mero gadget

काठमाडौँ । राष्ट्रिय परिचयपत्र व्यवस्थापन सूचना प्रणालीमा आएको समस्या समाधान भएसँगै १० दिनदेखि ठप्प रहेको सेवा पुनः सुरु भएको छ । गत वैशाख २१ गतेदेखि सर्भरमा खराबी आउँदा रोकिएको नयाँ परिचयपत्र दर्ता र नम्बर प्रमाणीकरणको कार्य आजदेखि नियमित भएको राष्ट्रिय परिचयपत्र तथा पञ्जीकरण विभागले जनाएको छ । विभागका अनुसार प्रणालीमा सुधार आएसँगै नयाँ इनरोलमेन्ट गर्ने र राष्ट्रिय परिचय नम्बरलाई प्रणालीले 'भ्यालिडेट' गर्ने काम सुरु भएको हो । प्रणाली अवरुद्ध हुँदा देशभरका हजारौँ सेवाग्राही मर्कामा परेका थिए । विशेषगरी राष्ट्रिय परिचयपत्र नम्बर स्वीकृत नहुँदा राहदानी बनाउने प्रक्रिया प्रभावित भएको थियो । साथै सामाजिक सुरक्षा भत्ता नवीकरण, व्यक्तिगत विवरण सच्याउने कार्य र जन्म दर्ताका क्रममा प्राप्त हुने परिचय नम्बर जेनेरेट गर्ने कार्य समेत प्रभावित बनेको थियो ।